Stjórn IBBY á Íslandi

Stjórn IBBY er kosin á aðalfundi ár hvert. Stjórnin hittist mánaðarlega, ræðir ýmis málefni, t.d. efni næsta tímarits, og skipuleggur reglulega atburði eins og afhendingar viðurkenninga og tilnefningar til verðlauna. Þá reynir stjórnin líka að brydda upp á ýmsum nýjungum sem vekja athygli á lestrarvenjum barna og þeirri viðleitni sem ýmis félagasamtök, stofnanir og einstaklingar sýna barnamenningu. Í ritnefnd tímaritsins Börn og menning sitja þrír fulltrúar sem taka einnig virkan þátt í stjórnarfundum.
Netfang: ibby@ibby.is

Formaður:

Katrín Lilja Jónsdóttir

 Katrín Lilja er ritstjóri vefsíðunnar Lestrarklefinn.is, síðu sem fjallar um bækur og lestur og leggur sérstaka áherslu á umfjöllun um barna- og unglingabækur. Katrín er með BA-gráðu í sagnfræði frá Háskóla Íslands og MA-gráðu í blaða- og fréttamennsku frá sama skóla.

Varaformaður:

Sverrir Norland

 Sverrir Norland hefur sinnt margbreytilegum störfum á sviði bókmennta og lista. Hann hefur fengist við skrif, þýðingar, fyrirlestra og bókmenntagagnrýni og hefur gefið út ljóðabækur, smásögur og skáldsögur í fullri lengd ásamt því að vera reglulegur gagnrýnandi hjá Kiljunni. Sverrir rekur útgáfuna AM forlag ásamt konu sinni, Cerise Fontaine. Ellefta bók hans, Stríð og kliður vakti athygli fyrir persónulega nálgun að stórum málefnum samtímans: tækni, sköpun og loftslagsvánni.

Ritari:

Linda Ólafsdóttir

 Linda Ólafsdóttir er teiknari og höfundur barnabóka, en hún hefur myndlýst fjölda bóka. Fyrir verk sín hefur Linda hlotið fjölda viðurkenninga og verðlauna, m.a. tilnefningu til Íslensku bókmenntaverðaunanna, Fjöruverðlaunin, tilnefningu til Astrid Lindgren Memorial Awards, Vorvinda viðurkenningu IBBY og í tvígang Barnabókaverðlaun skóla- og frístundaráðs Reykjavíkur. Fyrir Íslandbók barnanna fékk Linda heiðurssæti á lista IBBY 2018. Linda er formaður Fyrirmyndar, félags myndhöfunda, í stjórn FÍT (Félags íslenskra teiknara) og í Fulltrúaráði Myndstefs fyrir hönd FÍT.

Gjaldkeri:

Ingibjörg Ösp Óttarsdóttir

 Ingibjörg Ösp er með B.A. próf í bókasafns- og upplýsingafræðum og M.A. próf í hagnýtri menningarmiðlun. Hún starfar sem umsjónarmaður barnastarfs í Borgarbókasafni menningarhúsi í Grófinni. Ingibjörg sat í stjórn IBBY 2014-2016 sem gjaldkeri félagsins. Hún snéri aftur í stjórn félagsins árið 2017.
Meðstjórnandi:

Unnur María Sólmundsdóttir

 Unnur María er kennari og grafískur hönnuður. Hún starfar á skólabókasafni Breiðholtsskóla og að námsgagnagerð fyrir Menntamálastofnun. Unnur rekur jafnframt vefsíðuna Kennarinn.is sem er gagnabanki með fallegu og aðgengilegu náms- og skipulagsefni fyrir leik- og grunnskóla.
Meðstjórnandi:

Guðrún Elísa Ragnarsdóttir

 Guðrún Elísa er með BA í Textílhönnun frá Heriot Watt University og stundar nú MA nám í hagnýtri menningarmiðlun. Hún hefur starfað á Borgarbókasafni Reykjavíkur til fjöldra ára við ýmis verkefni sem tengist börnum og unglingum.


Formenn Íslandsdeildarinnar (nú IBBY á Íslandi) frá upphafi eru:

  • Sigrún Klara Hannesdóttir
  • Ragnheiður Gestsdóttir
  • Jónína Friðfinnsdóttir
  • Margrét Gunnarsdóttir
  • Iðunn Steinsdóttir
  • Anna Heiða Pálsdóttir
  • Sólveig Ebba Ólafsdóttir
  • Guðlaug Richter
  • Arndís Þórarinsdóttir
  • Ragnheiður Gestsdóttir
  • Ingibjörg Ösp Óttarsdóttir
  • Hjalti Halldórsson
  • Dröfn Vilhjálmsdóttir
  • Katrín Lilja Jónsdóttir