Íslensku barnabókaverðlaunin 2012

7. nóvember voru Íslensku barnabókaverðlaunin afhent í Austurbæjarskóla við hátíðlega athöfn. Verðlaunabókin er Hrafnsauga eftir þá Kjartan Yngva Björnsson og Snæbjörn Brynjarsson og er þetta þeirra fyrsta bók. Handrit Kjartans og Snæbjörns var valið úr 63 handritum sem bárust í samkeppnina. Að verðlaununum standa fjölskylda Ármanns Kr. Einarssonar, barnavinafélagið Sumargjöf, Ibby á Íslandi og Forlagið.

Nær þúsund ár eru liðin frá því myrkraöldin leið undir lok, þegar vitringarnir sjö komu saman og sigruðu skuggana. Hin myrka tíð hefur að mestu gleymst. En þótt minni manna sé brigðult gleyma hin fornu öfl engu. Innvígsluhátíðin nálgast, dagurinn þegar þulnameistarinn tilkynnir Ragnari, Breka, Sirju og jafnöldrum þeirra í þorpinu hvaða hlutverkum og skyldum þeim er ætlað að gegna. Krakkarnir ættu að njóta seinustu áhyggjulausu daganna í sumarsólinni en framtíðin ber annað í skauti sér. Án þess að friðsælir þorpsbúarnir viti af því hefur óstöðvandi atburðarás verið hrundið af stað. Hin fornu öfl sem eitt sinn steyptu heiminum í aldalanga nótt hafa vaknað og manngálkn þeirra eru aftur farin á stjá. Þau sækjast eftir einhverju í þorpinu, einhverju sem hefur verið falið í norðrinu frá ómunatíð. Fyrr en varir eru krakkarnir dregnir inn í atburði og ráðabrugg sem þeir hafa engan skilning á og komast að því að gjörðir þeirra skipta sköpum fyrir örlög þriggja heima.

Hrafnsauga er fyrsta bókin í Þriggja heima sögu, æsispennandi sagnaflokki þar sem blóðgaldrar, falin leyndarmál og gleymdar óvættir ógna heimunum öllum. Þetta er fyrsta skáldsaga Kjartans Yngva Björnssonar og Snæbjörns Brynjarssonar, og bar sigur úr býtum í samkeppninni um Íslensku barnabókaverðlaunin 2012.

Auglýsingar