IBBY á Íslandi hefur tilnefnt verk þriggja einstaklinga á heiðurslista alþjóðlegu IBBY samtakanna fyrir árið 2022.

Annað hvert ár er rithöfundi, myndhöfundi og þýðanda er veittur þessi heiður og fara tilnefndu bækurnar þeirra á bókasýningu sem ferðast um heiminn í tvö ár.

Viðurkenningarskjöl vegna heiðurslistans eru afhent á Alþjóðlegu þingi IBBY, þar sem bæklingur með tilnefndum bókum er kynntur í fyrsta sinn. Eftir þessa kynningu fara sjö sett af bókunum á ferðalag um heiminn og eru sýnd á ráðstefnum og alþjóðlegum bókasýningum. Eftir það eru bækurnar geymdar í alþjóðlegu barnabókasöfnunum í München, Zurich og í Bratislava.

IBBY á Íslandi tilnefnir eftirfarandi einstaklinga:

Ævar Þór Benediktsson í flokki rithöfunda fyrir bókina Þín eigin undirdjúp.

Útgefandi: Forlagið.

Áslaug Jónsdóttir í flokki myndhöfunda fyrir bókina Sjáðu!

Útgefandi: Forlagið.

Ingunn Snædal í flokki þýðenda fyrir bókina Handbók fyrir ofurhetjur. Fimmti hluti: horfin.

Útgefandi: Drápa.

Mikilvægur þáttur í vali bóka á heiðurslistann er að þær standi fyrir það besta sem barnabókmenntir hvers lands hafa upp á að bjóða og að bókin henti til útgáfu hvar sem er í heiminum. Heiðurslisti IBBY veitir innsýn í hinn ólíka menningarlega, stjórnmálalega og þjóðfélagslega bakgrunn sem börn um allan heim búa við.

IBBY á Íslandi óskar þeim Ævari, Áslaugu og Ingunni hjartanlega til hamingju.